Isang 20-anyos na dalaga ang pinasok, ninakawan at pinatay sa sakal ng lalaking kapitbahay sa loob mismo ng kanilang tahanan sa Purok 2 sa Barangay San Roque, Ozamis City, Misamis Occidental madaling araw nitong Biyernes, July 18.
Ayon sa mga opisyal ng Ozamis City Police Station at ng Misamis Occidental Provincial Police Office, pinatay ni Michael Epong sa sakal ang criminology student na si Princess Cabanes Eliaca sa loob mismo ng kanyang kuwarto sa kanilang bahay sa Purok 2 Barangay San Roque at tinangay sa kanyang pagtakas ang gintong kwentas at dalawang mobile phones ng dalaga.
Iniulat nitong Sabado ni Lt. Col. Harvey Abellanosa, Ozamis City police chief, na nasa kustodiya na nila si Epong na agad na na-detine ng abutan sa kanilang bahay ng mga pulis at barangay officials na nagresponde sa insidente.
Ayon kay Abellanosa at sa mga local executives ng Ozamis City, umamin na si Epong sa mga imbestigador, sa presensya ng isang abugado, sa kanyang nagawang krimen.
Ayon kay Abellanosa, isinalaysay ni Epong sa mga imbestigador na pagnanakaw ang sadya niya sa tahanan nila Eliaca at kanya itong pinatay sa sakal bago siya tumakas dala ang gold necklace at ang dalawang mobile phones ng dalaga, ngayon nasa kustodiya na ng pulisya.
Sinabi ng Epong sa mga imbestigador na nagawa niya ang krimen dahil sa matinding pangangailangan ng pera. (July 19, 2025)